واحد غلبان قوي زي حالاتي
قرر بدون مقدمات
ينزل للساحة
في لحظة ضعف طبعًا
تعالوا نشوف اللى حصل له
...
...
...
...
...
...
تعالوا يا ولاد حارتي
حبايبي يا عيون هارتي
تعالوا احكيلكو انا حكايتي
في عصر زمان
في عصر زمان
كان يا ما كان
راجل طول عمره كان تعبان
اسمه ايه والله ما فاكر
حسن متولي او حسّان
وكان عنده حزب كبيــر
خبيث ولا عنده أي ضمير
و
فيه يا حبايبي واد غلبان
ابوه هو كمان غلبان
وطول عمره فقير كحيان
في يوم يفطر ويوم جوعان
ويوم ريــّان ويوم عطشان
لا في الخاطر ولا الحسبان
قابلني زميلي مرة وقال لي
يا واد خيخة وضعيف وجبان
خايف تمشيلنا في مظاهرة؟
وجُبنك من وضوح شكله
علاماته عليك ظاهره
ونفسك تبقى البلاد طاهرة؟
هي السما بتمْطر مرجان ؟
ولاّ دهب او فضّة كمان ؟
:: أنا ::
حاسب يا حبيبي بطل زقّ
دي مستورة وبطّل نقّ
واقفلي فـ جنب تتّريق ؟؟
وبتولعها م الدخّان؟
:: زميلي ::
حبيبي..اطلع وقول الحقّ
وقول لظالمينك ..لأ
صوتك يوصل ولو موصلشي
ولا يهمك
دا ربك قادر
يهـدّ الظلم ويغرّق
:: أنا ::
انا يا حبيبي واد غلبان
لا انا وطني ولا اخوان
لا عمري خرجت في مظاهرات
ولا فـ اضراب ولا عصيان
باقول انا مالي وفـ حالي
جوز امي باقولّه يا خالي
رغيف يغلي وزيت غالي
ماليش دعوة..انا فـ حالي
ماليش في اللفّ والدوران
رجعت لبيتي من كام يوم
أنا وفكّرت
كلامه تمام ولا اقدر ألوم
وعقلي رجعلي واتفتّحت
انا لازم صحيت مـ النوم
انا لازم اكيد صحصحت
وبدأ المشــــــــــــــــــــــــــــــــــــــــــوَار
فـ يوم اسود ونيلة وزفت
عملت شجاع وعمري ما خفت
وجيت في مظاهرة واستفتحت
خدتني العزة قمت هتفت
كفايا ظلم
بقينا تحت
بقينا تحت
بقينا تحت
وأكيــــــــــــــــــــــــــد طبعـــــــــــــــــــــــًا
اتمسكت
خدوني السجن واتزبّطت
طلع على عيني وزّ وبطّ
وجاني غفير طويل وشحط
ومن رجليّا واتعلقت
ومتشقلب وفوقي لتحت
وشفت اللى فـ حياتي ما شفت
وهو واقف بيعلّق
اصرخ يقولوا دا بينهّق
حمــار صحيح ما بيفهمشي
صرصور وقاعد بيزقزق
أَصرُخ
يا ناااااااااااااس
ولا صوت مسمــــــوع!!
زي الدبيحة مرفوع مرفوع
دا يا اخوانّنا خروف للبيع
على قفايا ميتين توقيع
من كفّ شمشمون وابو سريع
قالولي كيف حالك دلوقت
صعبت عليا انا وعيطت
وقلت كفاية انا حرّمت
قالولي اصل انت كنت كفرت
كدا انت نضفت واتطهّرت
طب ابقى تعالى تاني
لأ..حرّمت
وقلت انا توبة أبت وتبت
..::..::..::..
رجعت لأهلى وولاد حارتي
في وسط الحارة جيت ووقفت
حكيت لهم كل اللى انا شفت
وقلت لو حد يفكر
يعمل لي شيبوب او عنتر
هيطلعوه زي حالاتي
ممصوص ويشبه عود اللفت
وقف وقال لي..
عمي الشيخ
صدقت يا ابني
قد أنصفت!!
واعتزلت النـــاس
هجرت الأهل والأصحاب
ومن اسبوع ما شفت كتاب
صعب حالي على صاحبي
سأل عني ودقّ الباب
:: زميلي ::
حبيبي يا عيون صاحبك
يا روح بابا ويا روح مامتك
مالك شايل طاجن ستّك؟
حاطط ايدك على خدك؟
زي الفراخ (مكسور) جناحين
وبــوزك ملوي طول شبرين؟!
ايه يعني اعتقلت يومين
ونابك كفّ او كفّين؟
فيه غيرك راح بقاله سنين
ما نعرف دول طريقهم فين!!
وهنسلّم بلدنا لمين؟؟
لشلة عزّ والفاسدين؟
يموت واحد يجيلنا اتنين؟
يا صاحبي
نبقى احنا الخاينين
شعبك سجين قوي ملّ الحبس
مـ الفقر صوته اصبح همس
عريان وماشي من غير لبس
قرفان بياكل من غير نفس
مش لاقي عيش بقى ياكل جبس
تعبـــَــــــــاان ولكن
مين بيحسّ
..::..::..::..::..
فيـ مين غيرنا يداوي الجرح؟
ويستحمل..ويزرع ارضه
جايز بكره هييجي الطرح
يهلّ نسيم من الحريّة
ونتباهى بسعادة وفرح
كلامك هزّني يا صاحبي
وحرك مـ الجراح قلبي
بلدنا الحبيبة غريبة
وناس ساكتة وناس تحبي
كلامك هزّ عقلي وقلبي
وحرك ريشتي بالألوان
رسمت الظلم والطغيان
خروف مدبــــــــــــــوح
وبقـــرة كمان
انا معاكم فـ خطّ النار
ولو خايف دا يبقى العار
هنحرقهم بولعة ونار
وسيف قادر متين بتّار
ناخد بالحق نحمي الدّار
دخلت السجن مين قدّي
رفضت الظلم والطغيان
دي كام ليلة وهتعدّي
ولو حبسوني ميت سجــّان
ايديّا في ايدكو يا اخوان
دا برده السجن للجدعان
دا برده السجن للجدعان
هناك 8 تعليقات:
السلام عليكم ...ما شاء الله .جميلة جدا وكالعادة سلسة ومشوقة للغاية.._معذرة عجبتني جدا صرصور بيزقزق اصلي ما كنتش اعرف ان صوتهم زقزقة_الموضوع جميل جدا بس الفكرة انه مش حبة الدلع دول بس ده عشان اول مرة ..لكن لما حضرتك هتبقي "كرونيك" علي المعتقلات ..هيبقي النظام حاجة تانية..امستعد له؟؟؟ثبتكم الله.لي سؤال هل هي شعر حر ام عرض للفكرة بنثر مسجوع؟؟؟انا في رايي انه اميل للشعر الحر ولكن اذا كان كذلك فمن فضلك راجع الوزن ففيه بعض الكسر علي مستوي القصيدة كلها..واعتقد ان بامكان قدراتكم الشعرية اصلا حها بسهولة..وفقكم الله ورزقكم الاخلاص والحكمة._
السلام عليكم ورحمة الله وبركاته..
الأخت الكريمة زهرة الأمل..
ما شاء الله..
كنت لسة يا دوب كاتبها ونشرتها من وقت بسيط جدا..
والله ولا انا كمان اعرف ان صوتهم زقزقة..بس عندنا لما صوصور بيعمل صوت..بيقولوا انه بيزقزق..ممكن ترجعي لقاموس الحشرات تتأكدي ^_^
وعموما موضوع اكيوت او كرونيك ع المعتقلات دي مش بتفرق كتير..
طالما ان انا كدا كدا هشرّف عندهم..
المسألة مسالة وقت..
ولما الواحد يبقى كرونيك أكيد هيعاملوه احسن شوية على حسب كلام الناس اللى راحت طبعا..هما بيقولونا كده وربنا يستر..
--------
اما بخصوص الموضوع نفسه وكونه شعر حرّ او نثر..
فبصراحة شديدة..من ايام الثانوية العامة ما ذاكرتش الأدب..ومش عارف اساسًا ايه الفرق بين الاتنين
وقدراتي الشعرية تتوقف عندما تبرز أحشاء النص الى الخارج..واحتار في وصفه وتقييمه..
كنت كتبت قصيدة من زمان وانا فـ اولى ثانوي وكانت في نظري جميلة جدا كبداية
فتفاجأت باحد الاخوة على االمنتدى يقول لي يبدو ان قصيدتك من بحر..والله ما انا فاكر..
وانت لازم تزبطها على البحر التاني-مش فاكر اسمه برده
وكلام غريب كده..
ومن ساعتها مكتبتش حاجة هناك خالص..
----------
عموما ياريت الجزء اللى حضرتك شايفة انه معووج ياريت تكتبيه هنا وانا ازبطه..
معلش هتعبك معايا..لكن كله بثوابه..
----------
وجزاكـِ الله خيرا على مرورك وعلى تعليقك
بصراحة قصيدة سلسلة فعلا زي ما الأخت زهرة الأمل بتقول ، ومعبرة وأحلى مافيه ختامها ، وربنا يثبتنا جميعا
بس أنا كان لي طلب بعد إذنك ياريت تغير الخط اللي انت بتكتب بيه عشان أنا فعلا بأعاني وأنا بأقرؤه دايما
وأحييك مرة أخرى على تدويناتك الحالية والسابقة
استوقفتنى صرصور بيزقزق
هو الصرصار بيزقزق ؟؟
:D
قصيده جميله
معبره
مسلسه تسلسل رائع
كان نفسي ارد عليك بقصيده صغيره
لكن لا كلام بعد كلامك
ماسبتلناش حاجه نقولها
لأ،،، استنى عليا شوية شوية
واضح ان كل بوست هقراه هدخل اعلق
اقابلك في بوست تاني
نور الدين،، تصفييييييييييييق
---------------------------
ربنا يكرمك يا دكتور عمر..
انت كدا الوحيد اللى عجبك ختامها
مش الناس التانية اللى عجبتها الصراصير ^_^
بخصوص الخطّ..
امممم
مش عارف انا بحب الخطّ دا جدًا..
لكن ان شاء الله اغيره التدوينة الجاية..
او هاكتبها مرتين وخلاص..
شكرا لمرورك..
وتقبل تحياتي
الاخت Radwa :
طبعا انتي كمان عجبتك الصاصير اللى بتزقزق..
لاحظي ان كل الاخوات اللى كتبوا تعليقات كتبوها عن الصراصير اللى بتزقزق..
وتفسيري لهذا والله اعلم انه هذا الامر يرجع الى عقد نفسية داخلية لا ارادية بسبب كثرة استخدامهم لل(شبشب) أعزكم الله ، وهو آداة تستخدم عندنا لمكافحة الصراصير..وايضًا..الأزواج -على الهامش..وكان هذا استخدام بديل في بداية التسعينات..اما الآن فهو استخدام سائد..
-----
شكرا لمرورك خفيف الظلّ..
تقبلي تحياتي
الأخت :مها
ربنا يكرمك..
ياريت والله دايما تتركي بصمتك على البوستات ..ويسعدني تعليقك
تقبلي تحياتي
إرسال تعليق